Oppenheimer (filme)

Oppenheimer é un filme británico-estadounidense de 2023, escrito e dirixido por Christopher Nolan. Está protagonizado por Cillian Murphy no papel de J. Robert Oppenheimer, un físico teórico que foi fundamental no desenvolvemento das primeiras armas nucleares, director do Laboratorio Nacional de Los Álamos, como parte do Proxecto Manhattan que deu comezo a era atómica. Baséase na biografía American Prometheus de Kai Bird e Martin J. Sherwin, e narra a carreira de Oppenheimer, coa historia centrada principalmente nos seus estudos, a súa dirección do Proxecto Manhattan durante a segunda guerra mundial e a súa eventual caída en desgraza por mor da audiencia de seguridade de 1954. O resto do elenco está composto por Emily Blunt como a muller de Oppenheimer, "Kitty", Matt Damon como o xefe do Proxecto Manhattan Leslie Groves, Robert Downey Jr. como Lewis Strauss e Florence Pugh como a amante comunista de Oppenheimer, Jean Tatlock, así como por Josh Hartnett, Casey Affleck, Rami Malek e Kenneth Branagh.